Reshjet e pandërprera të shiut kanë shkaktuar probleme serioze në infrastrukturën rrugore të Bashkisë Mat. Pothuajse të gjitha rrugët rurale janë dëmtuar, duke pësuar shembje dherash ose dëmtime të trupit të rrugës.
Një situatë e veçantë rreziku është krijuar në fshatin Bruç, ku dalja nga shtrati e përroit të Urakës kërcënon përmbytjen e disa banesave. Prurjet e mëdha kanë dëmtuar ndjeshëm argjinaturën mbrojtëse, duke e bërë zonën edhe më të cenueshme.
Kryetari në detyrë i Bashkisë Mat, Myslim Zeneli, së bashku me kryetarin e sapozgjedhur Altin Bojni, inspektuan nga afër situatën në terren. Zeneli u shpreh se gjendja e rrugëve rurale është tejet e rënduar, por ekipet e bashkisë po punojnë vazhdimisht për menaxhimin e emergjencës.
Reshjet e shiut pritet të vijojnë me intensitet edhe gjatë orëve në vijim, ndërsa parashikimet tregojnë se deri nesër moti do të mbetet i paqëndrueshëm. Kjo rrit rrezikun për probleme të tjera jo vetëm në Mat, por edhe në zona të tjera të vendit.