Presidenti i Kosovës Hashim Thaçi ka takuar sot në Prishtinë një delegacion gjermano-francez, dhe sipas njoftimit për shtyp është diskutuar për takimin e Parisit, vazhdimin e dialogut të udhëhequr nga BE.
Sipas njoftimit të bërë të ditur nga Gazeta Express, Thaçi ka theksuar se dialogu duhet të vijojë pa kushte, dhe taksa mbetet në fuqi.
Përsa i përket liberalizimit të vizave, ai ka kërkuar që qytetarët të mos mbahen të izoluar, duke u shprehur se nuk pranon kushte të reja. “Kosova nuk do të pranojë kritere tjera për liberalizimin e vizave, sidomos jo në formë të kërkesave për tarifat apo asociacionin”,mësohet të ketë thënë ai.
Sipas njoftimit thuhet se presidenti ka bërë të ditur se Kosova mbetet e përkushtuar për dialogun që duhet të përfundojë me marrëveshjen paqësore gjithëpërfshirëse, e cila do të sjellë njohjen reciproke mes Kosovës dhe Serbisë, si dhe anëtarësim të Kosovës në Kombet e Bashkuara
Pas takimit me Thaçin, delegacioni ka vazhduar në Qeveri aty ku po takohen me kryeministrin e Kosovës Ramush Haradinaj. Gjatë ditës është paraparë edhe takimi me krye parlamentarin Kadri Veseli.