Lara Colturi arriti të ngjitej për herë të tretë në podium në këtë sezon të Kupës së Botës, pasi u rendit e treta në garën e slalomit të zhvilluar të dielën në Kolorado të Shteteve të Bashkuara të Amerikës.
Skiatorja e Shqipërisë u vendos pas amerikanes Mikaela Shiffrin dhe gjermanes Lena Duerr në etapën e radhës, e mbajtur në Copper Mountain. Pas garës, 19-vjeçarja tha se ishte një luftë e fortë sportive.
“Ishte një ditë e vështirë. Ishte një luftë sportive. Të them të drejtën, nuk e prisja të shkoja në podium, por jam e kënaqur dhe dua të vijoj në këtë drejtim në garat e ardhshme”, tha Lara Colturi.
Lara Colturi sezonin e kaluar u ngjit 3 herë në podium, por në këtë sezon e arriti brenda të njëjtit muaj dhe në të gjitha rastet në disiplinën e slalomit. Lara është e dyta në renditjen e përgjithshme me kuotën e 278 pikëve pas 5 garave të zhvilluara.