Situata në Durrës vijon të mbetet kritike për shkak të reshjeve të dendura të natës së kaluar, të cilat kanë përkeqësuar gjendjen e lagjeve dhe rrugëve kryesore të qytetit bregdetar.
Sipas raportimeve niveli i ujit në disa zona periferike ka arritur në shkallë të lartë, duke i bërë të pakalueshme disa rrugë.
Rruga e Shkozetit, që të çon drejt zonës së Nishtullës, ka prezencë të madhe ujë, e cila pengon lëvizjen e automjeteve, duke e bërë zonën të papërshkueshme. Probleme të ngjashme raportohen edhe në dhjetëra lagje të ish-Kënetës dhe Porto Romanës, ku automjetet nuk mund të lëvizin.
Situata ka detyruar largimin e rreth 400 banorëve nga shtëpitë e tyre, pasi nuk kanë mundur të sigurojnë qasje të sigurt drejt zonave të tjera. Megjithatë, disa banorë kanë vendosur të qëndrojnë në banesat dhe bizneset e tyre për të ruajtur orenditë dhe pronat e tyre, duke u ekspozuar ndaj rrezikut të vjedhjeve dhe grabitjeve.
Ndërkohë, temperaturat kanë pësuar një ulje të ndjeshme, duke shtuar ndjesinë e vështirësisë për banorët e prekur, ndërsa disa zona të qytetit përballen edhe me ndarje të energjisë elektrike. Shumë kabina elektrike janë përmbytur, veçanërisht ato të vendosura në bodrume pallatesh dhe ambiente të tjera.
Forcat e emergjencës janë në terren, por kapaciteti i tyre nuk mjafton për të asistuar të gjithë banorët në nevojë.