Është mbledhur sot, më 22 janar 2026, Komisioni i Jashtëm ku është diskutuar mbi përmbajtjen e projektligjit për Bordin e Paqes.
Ministrja për Europën dhe Punët e Jashtme, Elisa Spiropali, prezantoi me pika përmbajtjen, ndërsa ftoi deputetet që të votojnë, duke theksuar se për projektligjin janë marrë opinionet e disa ministrive të ndryshme, si Ministria e Drejtësisë, Financave, Ministria e Mbrojtjes, Infrastrukturës dhe Energjisë si dhe ministria e Brendshme, për zbatimin e kësaj marrëveshje.
“Ky partneritet mbetet shtylla kryesore e politikës së jashtme dhe garanci për orientimin euroatlantik të vendit. Nga pikëpamja ligjore dhe kushtetuese, ky projektligj është në përputhje me dispozitat e kushtetutës së Republikës së Shqipërisë dhe me ligjin për marrëveshjet ndërkombëtare. Karta e Bordit të Paqes parashikon që asnjë shtet nuk është i detyruar të marrë pjesë në misione pa pëlqimin e tyre dhe se sovraniteti kombëtar mbetet i paprekur”, u shpreh Spiropali.
Teksa prezantoi disa nga krerët që përmban karta e Bordit të Paqes, Spiropali theksoi se “Shtetet mund të përfaqësohen në bord nga kreu i shtetit ose kreu i qeverisë. Çdo shtet anëtar ka një mandat tre vjeçar, subjekt i rinovimit nga kryetari i Bordit të Paqes”.
Sa i përket projektligjit, ajo shtoi se “në këtë fazë, projektligji nuk sjell kosto shtesë për buxhetin e shtetit. Kontributet do të jenë vullnetare dhe do të planifikohen në mënyrë transparente në buxhetin ne Ministrisë për Europën dhe Punët e Jashtme, sipas standarteve buxhetore afatmesme. Akti është hartuar nga ministria për Europën dhe Punët e Jashtme, në bazë të informacioneve të sjella nga ambasada e Shqipërisë në Uashington”.