Sot është Dita Botërore e Kreativitetit dhe Inovacionit.
UNESCO thotë se, nuk ka një përkufizim universal të kreativitetit. Ai mbetet një koncept i hapur për interpretim, që nga shprehja artistike deri te zgjidhja e problemeve në kontekstin e zhvillimit ekonomik, shoqëror dhe të qëndrueshëm.
Prandaj, Kombet e Bashkuara e caktuan 21 prillin si Ditën Botërore të Kreativitetit dhe Inovacionit për të rritur ndërgjegjësimin për rolin e kreativitetit dhe inovacionit në të gjitha aspektet e zhvillimit njerëzor.
Kreativiteti tregon se kush jemi dhe çfarë vlerësojmë. Ndihmon në ndërtimin e një përzierjeje të pasur kulturash dhe mbështet rritjen sociale dhe ekonomike. UNESCO, pas Konventës së vitit 2005, i ndihmon vendet të forcojnë industritë e tyre krijuese dhe të promovojnë lirinë artistike.
Sipas të dhënave të Kombeve të Bashkuara, financimi publik i drejtpërdrejtë për kulturën mbetet nën 0.6% të Prodhimit të Brendshëm Bruto (globalisht) dhe aktualisht është në rënie anembanë globit.
Dhe ndërsa legjislacioni sa i përket Inteligjencës Artificiale përparon në të gjithë botën, kultura ende mungon kryesisht nga debatet e qeverisjes, edhe pse shumë përmbajtje e gjeneruar nga IA-ja përdoret mbi punën krijuese të artistëve.
Industritë krijuese, të cilat përfshijnë produktet audiovizuale, dizajnin, mediat e reja, artet interpretuese, botimet dhe artet vizuale, janë një sektor shumë transformues i ekonomisë botërore për sa i përket gjenerimit të të ardhurave, krijimit të vendeve të punës dhe fitimeve nga eksporti. Kultura është një komponent thelbësor i zhvillimit të qëndrueshëm dhe përfaqëson një burim identiteti, inovacioni dhe krijimtarie për individin dhe komunitetin. Në të njëjtën kohë, krijimtaria dhe kultura kanë një vlerë të konsiderueshme jo-monetare që kontribuon në zhvillimin shoqëror gjithëpërfshirës, në dialogun dhe mirëkuptimin midis popujve. Sot, industritë krijuese janë ndër fushat më dinamike në ekonominë botërore, duke ofruar mundësi të reja për vendet në zhvillim për të kaluar në zona me rritje të lartë në ekonominë botërore.