Xhanluka Roki, dizenjatori i gjyqtarëve të Serisë A dhe B, i cili është bërë epiqendra e skandalit të “xhaketave të zeza” në Itali, ka këtë të enjte një ditë vendimtare sa i përket kësaj çështje. Ai është ftuar nga prokurorët e çështjes që të paraqitet për të dhënë dëshminë e tij.
Por ndryshe nga sa mendohej, dizenjatori i cili është vetë-pezulluar nga detyra derisa të marrë fund hetimi, duket se do të ushtrojë të drejtën e tij për të mos e bërë një gjë të tillë. Në fakt, ka qenë avokati që e përfaqëson, Antonio D’Avirrio, ai i cili ka njoftuar mediat se një deponim i Rokit nuk do të ndodhë në situatën aktuale.
“Roki dëshironte të paraqitej, por vendosa unë që të hiqnim dorë, pasi në situatën aktuale, duke mos qenë në njohje të dosjes të hetimeve paraprake, ndjej se nuk jam në gjendje të zhvilloj në mënyrë efikase mandatin tim për mbrojtjen”, sqaroi avokati në një komunikatë të shpërndarë për mediat.
Kësisoj, avokati ka lënë të kuptohet se pret të jetë në dijeni të plotë të dosjes që ka Prokuroria me të cilën Roki akuzohet për mashtrim sportiv, duke favorizuar vendime apo skuadra të caktuara, më saktësisht Interin.