Ferit Hoxha, ministri i Jashtëm i vendit sot në 4 maj po raporton në Komisionin e Jashtëm në parlament.
U ndal tek fakti se është përfolur për bllokim të procesit të integrimit të Shqipërisë në Bashkimin Europian. Ai tha se kjo nuk është aspak e vërtetë, por se integrimi vijon normalisht.
“Nuk ka pasur e nuk ka bllokim. Nuk ka pasur dhe nuk ka veto. Procesi i integrimit vazhdon normalisht. Komisionerja Kos disa herë ka theksuar se integrimi i vendit vijon. Ajo që është thelbësore është puna dhe rezultatet tona.
Ne duhet të përmbushim reformat e duhet të bëjmë pjesën tonë me seriozitet. Ne duam ta çojmë Shqipërinë në Europë brenda vitit 2030. Një sërë ministrash të vendeve të BE-së kanë ardhur në Tiranë dhe kanë shprehur mbështetje për Shqipërinë në BE. Sot kemi një situatë gjeo-politike të ndryshme dhe kemi dhe vende, që janë skeptike ndaj Bashkimit Europian. Është vetë BE-ja që përballet me kundërshtime dhe duhet ta njohim këtë realitet të ri“, tha Hoxha.
Komentoi dhe një artikull të gazetës gjermane Frankfurter Allgemeine Zeitung (FAZ), e cila thoshte se Shqipëria e Serbia janë gati që të anëtarësohen në BE, pa të drejtë vetoje.
Ministri Hoxha deklaroi se është thjesht një artikull. Ai shtoi se Shqipëria e Serbia ndajnë mendim krejt ndryshe për Kosovën, por se bashkëpunimi për anëtarësim është i nevojshëm.
“Kush e mendonte se Shqipëria do anëtarësohej në SEPA? Shqipëria bën pjesë dhe në Planin e Rritjes. Këtu bën pjesë ajo që quhet integrimi i përshpjetuar. Shqipëria bashkëpunon me vendet e rajonit. Është një artikull i shkruar në një gazetë për Vuçiç. Është veç një artikull dhe nuk është aleancë. Kjo dëshmon se vendet e rajonit, pavarësisht dallimeve të mëdha, mund të bashkëpunojnë, kur interesat strategjike përkojnë. Integrimi kërkon dialog. Asgjë në atë artikull nuk zbeh qëndrimet e Shqipërisë për Kosovën dhe për çështje të tjera, që jemi në kundërshtim me Serbinë. Nuk ka dëm fare për Kosovën”, deklaroi Hoxha.