Sulmuesi i Kombëtares Shqiptare Myrto Uzuni dhe mesfushori Julian Shehu mbajtën një konferencë për mediet sot në 1 qershor, përpara miqësoreve që do luajë përfaqësuesja kuq e zi me Izraelin dhe Luksemburgun.
Uzuni u shpreh se trajneri i ri luan ofensiv, duke shtuar se sulmuesit në ekipet që ai ka menaxhuar, kanë shënuar shumë gola.
Ai tha se uron e shpreson që ai vetë, por edhe lojtarët e tjerë të shënojnë shumë gola për Shqipërinë.
Myrto Uzuni: Trajneri i ri preferon të luajë ultra-ofensiv. Besoj se do të bëhet një lojë ndryshe, por çdo gjë do shikohet në fushën e blertë. Normalisht, secili do të tregojë veten, çdo lojtar ka kualitete. Çdokush mund të luajë titullar, pasi janë lojtarët më të mirë që ka Shqipëria. I uroj shumë suksese trajnerit Sylvinho.
Për sa i përket trajnerit të ri, nëse sheh skuadrat që ka menaxhuar, sulmuesit e tij kanë shënuar shumë gola dhe uroj që kjo të ndodhë në Kombëtare. Gjithmonë kur luan me Kombëtaren, luan për kombin dhe është një përgjegjësi e madhe.