Një 29-vjeçar nga Maliqi ka denoncuar se është dhunuar nga efektivë të policisë greke, ndërsa mbrëmjen e djeshme është paraqitur në urgjencën e Spitalit Rajonal të Korçës për të marrë ndihmë mjekësore.
Sipas burimeve zyrtare, bëhet fjalë për shtetasin Maldin Maxhari, i cili ka deklaruar se ngjarja ka ndodhur rreth 13 ditë më parë në zonën e Kalkidhës, në Greqi.
Sipas dëshmisë së tij, ai është ndaluar nga policia greke pasi është ngatërruar si autor i një vepre penale, por pas verifikimeve ka rezultuar i pafajshëm.
29-vjeçari pretendon se gjatë ndalimit është ushtruar dhunë fizike ndaj tij. Për këtë ngjarje ai ka bërë kallëzim pranë autoriteteve greke, ndërsa më pas është dëbuar nga territori grek dhe është kthyer në Shqipëri përmes pikës kufitare të Kakavijës.
Për shkak të problemeve shëndetësore dhe dëmtimeve të marra, Maxhari është paraqitur në Spitalin Rajonal të Korçës, ku po i nënshtrohet ekzaminimeve mjekësore. Burime bëjnë me dije se dyshohet për dëmtime në brinjë dhe në shpretkë, ndërsa priten rezultatet e kontrolleve përkatëse.
Ndërkohë, Policia e Korçës ka marrë deklarimet e 29-vjeçarit dhe po verifikon rrethanat e ngjarjes. Duke qenë se episodi i denoncuar ka ndodhur në territorin grek, procedurat e mëtejshme pritet të ndiqen në bashkëpunim me autoritetet kompetente.