19 qershor 2026 – Kryebashkiaku i Tiranës, Erion Veliaj, ndodhet në ambientet e Gjykatës Administrative ku po mbahet seanca gjyqësore lidhur me padinë e tij ndaj prokurorit Ols Dado. Ky i fundit po heton çështjen penale ndaj tij.
Veliaj kërkon shfuqizimin e dekretit të presidentit që e ka emëruar prokurorin në detyrë në vitin 2008.
Siç raporton gazetarja e Klan News, Glidona Daci, në seancë mungojnë përfaqësuesit e Këshillit të Lartë të Prokurorisë (KLP). Ka debate lidhur me moslejimin e kamerave në sallë.
“Ne nuk kemi marrë një përgjigje nga ana e KLP-së. Ajo ka investuar më shumë në terr sesa në dritë. KLP nuk është mbledhur asnjëherë për ankesën tonë. Mendoj se është më mirë kështu, në mungesë të tyre”, është shprehur Veliaj.
“Kërkoi që gjykimi të vijojë në mungesë të KLP-së, pasi pretendimet e tyre janë dorëzuar”, ka shtuar avokati i Ols Dados.
“Seanca është publike. Çfarë kërkon një punonjës i Policisë së Shtetit në këtë sallë gjyqi? Çfarë kërkon kryesekretarja e gjykatës që vendos nëse lejohen apo jo kamerat? Mbyllja hermetike e një gjykate, duke iu referuar Kushtetutës, nuk është e pranueshme. Ky proces duhet të jetë para syve të publikut. Kjo është e papranueshme, i nderuar gjyqtar. Ekziston një udhëzim i KLGJ-së, të cilin ju po e përdorni si bazë ligjore“, ka argumentuar avokati i Veliajt, Plarent Ndreca.