Fundjava do të dominohet nga mot i kthjellët dhe temperatura shumë të larta, me vlerat maksimale që pritet të arrijnë deri në 41 gradë Celsius. Sipas parashikimeve meteorologjike, kushtet e qëndrueshme atmosferike do të vijojnë edhe në fillim të javës, ndërsa një ndryshim i motit pritet nga mesi i saj.
Sinoptikania Elida Maloçali shpjegoi se moti i nxehtë është pasojë e pozicionimit të një zone me presion të lartë atmosferik mbi Evropë, si edhe forcimit të anticikloneve afrikanë dhe atij të Azoreve.
Gjatë fundjavës, vendi do të ketë mot kryesisht të kthjellët dhe me diell, ndërsa vranësira të pakta do të shfaqen vetëm në zonat malore. Erërat do të fryjnë me shpejtësi deri në 7 metra për sekondë, duke bërë që deti të ketë valëzim të forcës 1-2 ballë.
Temperaturat do të luhaten nga 22 deri në 41 gradë Celsius, ndërsa e njëjta situatë pritet të vijojë edhe në fillim të javës, me maksimumet që do të mbeten në intervalin 40-41 gradë Celsius.
Ndryshimi i kushteve atmosferike parashikohet në mesjavë, kur moti do të bëhet më i paqëndrueshëm. Vranësirat do të shtohen dhe do të shoqërohen me reshje shiu me intensitet të ulët në pjesën më të madhe të vendit, ndërsa në disa zona priten edhe shtrëngata afatshkurtra të shoqëruara me shkarkesa elektrike.
Sipas Maloçalit, era do të forcohet, duke arritur shpejtësi nga 8 deri në 18 metra për sekondë. Si pasojë e këtij ndryshimi, temperaturat do të pësojnë një rënie të ndjeshme, me vlerat maksimale që nuk pritet të kalojnë 35-36 gradë Celsius.