Një tragjedi detare ka ndodhur në brigjet e Guajanës, në Amerikën e Jugut, ku trageti i pasagjerëve MV Barima u përmbys gjatë natës në Oqeanin Atlantik, duke lënë dhjetëra persona të zhdukur.
Sipas autoriteteve, në bord ndodheshin 116 pasagjerë dhe 17 anëtarë të ekuipazhit. Deri tani, ekipet e kërkim-shpëtimit kanë nxjerrë të gjallë 67 persona, mes tyre 15 fëmijë, ndërsa operacioni vazhdon pa ndërprerje për gjetjen e të tjerëve.
Trageti kishte nisur udhëtimin nga Georgetown, kryeqyteti i Guajanës, me destinacion Port Kaituma, një zonë e largët në veriperëndim të vendit. Sinjali i emergjencës u dërgua rreth orës 23:01 sipas kohës lokale, çka vuri në lëvizje menjëherë operacionin e kërkim-shpëtimit me pjesëmarrjen e rojës bregdetare, forcave të armatosura dhe mjeteve private detare e ajrore.
Ministri i Punëve Publike, Juan Edghill, deklaroi se dëshmitë paraprake të të mbijetuarve tregojnë se trageti mund të jetë goditur nga një valë e fuqishme, e cila e destabilizoi dhe e përmbysi. Megjithatë, autoritetet theksojnë se shkaku i saktë do të përcaktohet vetëm pas hetimit zyrtar. Sipas ministrit, deri tani nuk ka prova që incidenti të jetë shkaktuar nga defekt teknik apo mbingarkesë.
Qeveria e Guajanës ka ngritur qendra të posaçme informacioni dhe asistence për familjarët e pasagjerëve, ndërsa kryeministri Mark Phillips ka bërë të ditur se operacioni i kërkimit do të vazhdojë derisa të gjenden të gjithë personat që ndodheshin në bord.
Autoritetet kanë konfirmuar gjithashtu se trageti ishte i pajisur me mjete shpëtimi, përfshirë 250 jelekë shpëtimi, varka dhe mjete të tjera emergjence, por ende nuk është e qartë se si u zhvilluan momentet e fundosjes dhe nëse të gjithë pasagjerët arritën t’i përdornin ato.