Marc Cucurella sapo ka kurorëzuar karrierën e tij me triumfin në Kupën e Botës 2026 me Spanjën, por sfida më e madhe e jetës së tij zhvillohet larg fushave të futbollit.
Në dokumentarin Married to the Game, mbrojtësi spanjoll ka folur me emocion për djalin e tij 6-vjeçar, Mateo, i cili është diagnostikuar me autizëm. Teksa rrëfen përvojën e familjes, zëri i Cucurellës dridhet nga emocionet.
“Asgjë nuk të përgatit për këtë”, shprehet ai, duke kujtuar momentin kur familja mësoi diagnozën. Futbollisti tregon se ndjenja e pafuqisë ishte e madhe dhe se gjithçka duhej mësuar nga e para.
Në një intervistë tjetër për La Media Inglesa, ai tha se dhimbja më e madhe e një prindi është të shohë fëmijën të vuajë pa mundur ta ndihmojë.
Edhe bashkëshortja e tij, Claudia Rodríguez, ka treguar vështirësitë që kaloi familja gjatë përshtatjes së Mateos me shkollën. Sipas saj, çdo mëngjes e çonin me shpresë në klasë, por pas pak orësh detyroheshin ta merrnin në shtëpi, pasi ai nuk ndihej mirë në atë ambient.
Për familjen Cucurella, çdo vendim i rëndësishëm merret duke pasur në qendër mirëqenien e Mateos. Ndryshimet e rutinës, udhëtimet, madje edhe transferimet në klube të reja vlerësohen fillimisht në bazë të mundësive që ofron qyteti për shkollim dhe terapi të specializuara.
Vetë futbollisti ka treguar se, kur një klub interesohet për ta transferuar, ai dhe bashkëshortja fillimisht kërkojnë informacion për shkollat dhe shërbimet mbështetëse për djalin e tyre, duke e vendosur gjithmonë familjen mbi karrierën sportive.
Duke folur hapur për autizmin, Cucurella shpreson të inkurajojë edhe prindër të tjerë që përballen me të njëjtën sfidë.
Sipas tij, çdo përparim i vogël i Mateos ka një vlerë që nuk mund të krahasohet me asnjë trofe. Futbollisti thekson se djali i tij dhe fëmijët si ai i kanë mësuar familjes një mënyrë të re për të parë jetën dhe për të vlerësuar gjërat që kanë vërtet rëndësi.