Presidenti amerikan Donald Trump, nënshkroi një urdhër ekzekutiv që parashikon më pak vaksinime për fëmijet duke e kufizuar përdorimin e tyre për vetëm për 11 lloje virusesh dhe sëmundjesh.
Urdhri gjithashtu rekomandon ndarjen e vaksinës së fruthit, shytave dhe rubeolës për fëmijë në tre doza dhe dhënien e dozave në vizita të ndara mjekësore.
Ekspertët e kanë kundërshtuar këtë vendim të presidentit amerikan. Agjencia e lajmeve Reuters, citon ekspertë të cilët thonë se zvogëlimi i vaksinave të rekomanduara do t’i lërë më shumë fëmijë të prekshëm ndaj sëmundjeve të parandalueshme.
Sipas presidentit Trump, ulja e numrit të vaksinave dhe ndarja e dozave, është më shumë efektive.
“Me efekt të menjëhershëm, administrata ime po njeh rekomandimet e vaksinave të fëmijërisë në 11 vaksinime kryesore kundër sëmundjeve më serioze dhe të rrezikshme. Vaksina e fruthit, shytave dhe rubeolës po ndahet në tre doza të veçanta të vetme dhe vaksinat do të bëhen në vizita të veçanta. Për shembull, në një vit duhet të bëhen vizita të veçanta për vaksinat në vend që t’i bëhen të gjitha në të njëjtën ditë”, tha Trump.
Urdhri udhëzon prokurorin e përgjithshëm të ngrejë padi mbi ligjet shtetërore që bien ndesh me këtë urdhër federal të Presidentit.
Urdhri i ri u nënshkrua para se nxënësit të kthehen në shkolla në Shtetet e Bashkuara dhe pasi vendi është përballur me një shtim të rasteve të fruthit.
Të dhënat federale tregojnë se normat e vaksinimit në kopshte në Shtetet e Bashkuara kanë rënë sidomos gjatë vitit të fundit shkollor.