Të rinjtë kërkojnë të studiojnë ligjet dhe kjo ambicie e renditi edhe për këtë vit Fakultetin e Drejtësisë si më të kërkuarin.
Gjatë një interviste për mediat dekania Dorina Hoxha shpjegoi se ndryshe nga më herët kur të gjithë ëndërronin të bëheshin gjyqtarë, prokurorë dhe avokatë, sot studentët e juridikut synojnë tu bashkangjiten korporatave ndërkombëtare dhe fushës së ligjeve në botën dixhitale dhe të kontratave
“Një nga arsyet kryesore që aplikojnë tek ne është për të gjetur drejtësinë, jo në drejtësinë në kuptimin klasik dhe të drejtën e fjalës, por për të gjetur, por edhe një profesion që nuk ngushtohet në zhvillimin e një dege të caktuar, sepse me zhvillimet e sotme politike dhe ekonomike janë hapur fusha të reja, të cilat kanë qenë të paeksploruara më parë.
Ju ka dhënë mundësi juristëve që të ketë sigurisht jo vetëm një profesion dhe të kenë mundësi të reja karriere, duke pasur parasysh zhvillimet teknologjike, inteligjencën artificiale, krimet kibernetike, mashtrimet kompjuterike, mbrojtjen e të dhënave personale. Këto janë fusha të reja që nuk është menduar më përpara që do të kishte nevojë profesioni i juristit për t’i dhënë zgjidhje problemeve që dalin.
Të gjitha këto zhvillime të reja kanë sjellë domosdoshmërisht nevojën për juristin, për t’i dhënë zgjidhje problemeve që mund të jenë të karakterit administrativ, karakter civil, por mund të jenë edhe karakter penal”, u shpreh dekania Hoxha.
Dekania Hoxha thotë se për këtë vit do të ulen në auditorë për të studiuar ligjet mbi 600 studentë.