Një gjykatë jordaneze ka dënuar me vdekje përmes varjes tre burra, për kryerjen e një sulmi të përgjakshëm në një kishë muajin e kaluar, shkruan BBC.
Sulmi i datës 23 tetor la të vdekur nëntë persona dhe plagosi 34 të tjerë, të cilët po merrnin pjesë në një funeral të krishterë në një kishë ortodokse greke, në provincën Karak.
Forcat e Armatosura të Jordanisë njoftuan të dielën se burrat u shpallën fajtorë për kryerjen e “akteve terroriste”, si dhe për posedim armësh, “promovim të ideve të një organizate terroriste” dhe “komplot për të kryer akte terroriste”.
Tre burrat – dy vëllezër jordanezë dhe kunati i tyre – u larguan nga vendi i ngjarjes dhe u arrestuan tri ditë më vonë. Identiteti i tyre nuk është bërë publik.
Karaku është shtëpia e një komuniteti të konsiderueshëm të krishterë, brenda mbretërisë ku shumica e popullsisë është myslimane.
Pamjet nga kamerat e sigurisë, të regjistruara ditën e sulmit, shfaqin tre burra të armatosur teksa afrohen dhe hapin zjarr ndaj kishës së Shën Gjergjit, në fshatin Hmoud.
Një video e dytë shfaqte njerëz të vdekur dhe të plagosur të shtrirë përtokë, mes skenave kaotike në kishë.
Mbetet ende e paqartë pse sulmuesit zgjodhën të shënjestronin pikërisht atë kishë.
Menjëherë pas sulmit, Mbreti i Jordanisë, Abdullah II, shkroi në platformën X: “Sulmi terrorist kundër Karakut do të përballet me hakmarrjen më të ashpër.
“Ata që ushqejnë iluzionin se mund t’i përçajnë jordanezët me plumbat e tyre, nuk kanë asnjë shans përballë unitetit tonë.”
Tre burrat u larguan nga vendi i ngjarjes dhe më vonë u gjetën brenda një shtëpie të braktisur në provincën e Karakut, në jug të kryeqytetit Aman.
Ata refuzuan të dorëzoheshin dhe hapën zjarr ndaj forcave të sigurisë, të cilat u kundërpërgjigjën me zjarr, duke i plagosur të tre, njoftoi në atë kohë Drejtoria e Sigurisë Publike. Asnjë pjesëtar i forcave të sigurisë nuk u lëndua gjatë shkëmbimit të zjarrit.
Mbreti Abdullah i vlerësoi forcat e sigurisë për ndjekjen e të dyshuarve “deri në fund”.
Një javë pas të shtënave në Karak, Jordania goditi ato që ushtria e saj i cilësoi si “organizata terroriste” në Siri, si kundërpërgjigje ndaj sulmit në kishë.
Zyrtarë të shëndetësisë siriane i thanë medias shtetërore se pesë persona, përfshirë gra, fëmijë dhe një burrë të moshuar, u vranë gjatë një sulmi në një fshat në provincën jugore të Daraas. Jordania deklaroi se avionët e saj luftarakë kishin vrarë dhe plagosur “disa terroristë”, pa dhënë detaje të mëtejshme.
Jordania njoftoi se kishte bashkërenduar veprimet me qeverinë siriane, por Siria deklaroi se nuk ishte njoftuar paraprakisht.
Në Jordani, ekzekutimet kryhen me varje. Mbretëria kishte zbatuar më parë një ndalim jozyrtar të ekzekutimeve nga viti 2006 deri në vitin 2014, si dhe një periudhë tjetër pezullimi nga viti 2017 deri në qershor të këtij viti.