Vinjolli i Matit është një fshat në territorin e njësisë administrative Lis. Ndodhet fare afër fshatrave të Dibrës. Deri në fund të viteve ’90-të kishte të paktën 160 familje, me më shumë se 900 banorë.
Aktualisht fshati malor ka 15 familje, me afro 60 banorë. 145 familje kanë lënë vendlindjen dhe janë vendosur në periferi të Tiranës e Durrësit. Një pjesë e tyre kthehen gjatë verës në vendlindje, mbjellin perime, qëndrojnë aty sepse klima është mjaft e mirë.
Dikur shkolla kishte më shumë se 200 nxënës, nga klasa e parë në të tetën. Tani numri i nxënësve është vetëm nëntë. Objekti u reabilitua dhe kompletua në vitin 1995 nga vinjollasi që kishte emigruar në Izmir të Turqisë. Aktualisht objekti është në gjendje kritike. Çatia e shkollës është drejt rrënimit dhe vë në rrezik vogëlushët e fshatit.