Ditmar Bicaj nuk do të jetë më tej trajner i skuadrës së Burrelit. Në këto rrethana matjanët po kontaktojnë disa trajnerë të njohur të futbollit shqiptar, për t’i besuar drejtimin e skuadrës së mbretërorëve.
Drejtori Teknik Klevis Gjoka dhe Administratori i KF Burreli Marjan Lleshaj kanë patur sot një takim me teknikun Samuel Nikaj, një emër ky i njohur i pankinave shqiptare, brenda dhe jashtë kufijëve. Ende nuk ka një marrëveshje zyrtare, por palët do të vendosin pas pak ditësh cili do të jetë vendimi i tyre.
Burime nga ky takim i thanë tirananews.al se Samuel Nikaj ka një karrierë brilante në drejtimin e skuadrave të Superligës dhe Kategorisë së Parë në Shqipëri dhe ato të Kosovës. Ka punuar me zell te Akademia Vllaznia dhe në Superiore ka drejtuar Vllazninë dhe Tërbunin e Pukës. Sakaq në Kategorinë e Parë ka drejtuar me profesionalizëm Burrelin, Adën, Besëlidhjen, Mamurrasin dhe Pogradecin.
Në Kosovë ka lënë gjurmë pozitive teksa drejtonte ekipet e Prishtinës, Prizrenit dhe Vushtrisë. Në memorien e teknikut shkodran kanë mbetur titujt kampion të Vllaznia U 17 dhe U 19 si dhe ngjitja një kategori më lart e tre ekipeve të Kosovës.
Nga takimi i fundit Gjoka-Lleshaj-Nikaj nuk kemi diçka konkrete. Detajet do të mësohen pas datës 10 Korrik 2025, kur matjanët dhe trajneri i ri do të bien dakort për kushtet e kontratës. T.N.
