Genc Ruli është një nga figurat më të rëndësishme të Partisë Demokratike ndër kohëra.
Së fundmi ai u rikthye në këtë forcë politike ku ka marrë rolin e anëtarit të Komisionit të Vlerësimit të kandidatëve për deputetë në zgjedhjet e 2021.
Ruli ka bërë me dije se ai vetë nuk do t’i rikthehet më jetës aktive në politikë.
Ruli tha se dosjet e kandidatëve të propozuar ende nuk i janë vënë në dispozicion Komisionit të Vlerësimit, ndërsa thekson se eksperienca duhet të prevalojë ndaj prurjeve të reja.
Gjatë intervistës për ABCNews, Ruli u pyet edhe nëse Berisha do të kandidojë apo jo në këto zgjedhje.
“Berisha ka akulumuar aq shumë lavdi politike sa do i mjaftonin edhe për dy jetë. Njerëzit mund të hyjnë edhe rastësisht në politikë, por arti i tërheqjes është më vete. Unë nuk di të them nëse z. Berisha do të kandidojë apo jo, por mendoj se Parlamenti i ri, nuk do t´i japë atë komoditet apo atë lavdi që ka akumuluar deri më tani”, u shpreh Ruli.
Ai tha gjithashtu se për ish-kryeministrat, nënkryetarët, sekretarin e përgjithshëm apo figurat historike të PD, Komisioni nuk mund të bëjë vlerësime nëse plotësojnë ose jo kritere, pasi është historia që i gjykon.