Pedagogia e njohur, Endira Bushati shprehet e bindur se Presidenti Ilir Meta nuk do të paraqitet në Komisionin Hetimor që është ngritur për shkarkimin e tij.
E ftuar në emisionin “Breaking”, Bushati u shpreh se “ne e dimë që presidenti i Republikës ka një axhendë të përcaktuar, por kjo nuk duhet të bëhet pengesë për një gjë kaq madhore”.
“Asgjë nuk mund të jetë e rëndësishme për presidentin se sa ky komision. Ky komision heton, e Meta nuk shkon derisa të plotësohen afatet”, tha pedagogia.
Ndërsa e pyetur se cilën nga deklaratat e forta që ka bërë Meta, do donte të fshinte, Bushati tha se atë që ka bërë për ambasadoren amerikane, Yuri Kim.
“Po të rikthehej në kohë, do donte të fshinte deklaratat për ambasadoren se sa sfurqet. Se ato për dhunën mund të thotë se janë metaforike”, tha pedagogia e njohur.
Kjo e fundit shtoi më pas se mazhoranca këtë herë ka një qëllim dhe shkarkimin e Metës do ta bëjë me numrat që ka në parlament.
“Ka disa elementë që nuk na lejojnë të themi që të jemi të sigurt se do të ndodhë shkarkimi i Metës. Por procesi ka disa hallka, e mazhoranca thotë të bëjmë të parën, ta shkarkojmë në Parlament. Mendoj se Rama ka humbur për shkak se e ka vënë Metën president. Nuk mund të themi se ka qenë president i Shqipërisë, ka qenë shefi real i një partie politike. Nuk mund të themi se ka qenë mbi palët, pasi ka qenë palë e një partie politike. Nuk mund të themi se Meta ka qenë në lartësinë e asaj që kërkon roli i presidentit, e kjo është përgjegjësi e Ramës, i cili po mundohet të korrigjojë gabimin e tij”, tha Bushati.