Vijojnë abuzimet me abonetë në kryeqytet. Për të përfituar një abone studenti duhet të kesh mik ose duhet ti drejtohesh tregut të zi në rrugë informale. Studentët thonë se e kanë të vështirë që çdo muaj të sigurojnë abonenë me 600 lekë, ndaj detyrohen që të paguajnë sa të gjithë qytetarët që përdorin transportin publik 1600 lekë.
Studentët thonë se abonenë i marrin vetëm personat që kanë miq. “Shikoj në autobus njerëz tek të 40-at që kanë abone ndërsa unë si student rri me abonenë e përgjithshme. Asnjëherë nuk e kemi marrë abonenë e studentit, blejmë abone të përgjithshme si gjithë të tjerët. Nuk është në treg, vetëm në tregun e zi.Mund ta marrësh nëse ke ndonjë mik apo njohje”, shprehen studentët.
Shqetësimi ngrihet edhe nga Qëndresa Qytetare. Në një raport të saj bëhet me dije se 80% e studentëve nuk përfitojnë abone për shkak të numrit të limituar që del në treg. “Bashkia nuk ka një procedurë ligjore të saktë për shpërndarjen e aboneve. Mungesa e kësaj procedurë ligjore ka sjellë abuzim dhe as këta 13904 studentë nuk mund ta aksesojnë në mënyrë të drejtë blerjen e kësaj aboneje”.