Bullizmi në rrjetet sociale është bërë sërish shkak, duke shtyrë një 16 vjeçar t’i japë fund jetës. Ngjarja e rëndë është shënuar në Britani, ku një adoleshent i ka dhënë fund jetës pasi shantazhohej nga një mashtrues në rrjet.
Mediat britanike shkruajnë se 16-vjeçari Dinal De Alwis, pas bisedave që kishte patur me një shtetas nigerian në Spanpchat, ishte shantazhuar nga ky i fundit se do t’i bënte publike foto në rast se nuk i dërgonte 100 paund.
16-vjeçari i cili nuk kishte mundur të përballonte presionin, ishte larguar nga banesa në drejtim të Londrës jugore ku edhe kishte bërë një video ku njoftonte se do të vriste veten.
“Ai i shkroi gruas time, i tha se na donte shumë, dhe i tha dy vëllezërve të kujdeseshin për prindërit”, deklaroi babai i Dinal para gjykatës.
Policia britanik tha se nuk mund të gjurmonte mashtruesit të cilët operonin nga Nigeria.
Prindërit shtuan se Dinal besonte se fotot e tij ishin shpërndarë në rrjet, dhe u gjet i vdekur disa orë pasi kishte dalë nga shtëpia.
“Dinal ishte një djalë i kujdesur, kishte nota të shkëlqyera. Ne vijmë nga Sri Lanka, dhe ishim krenarë që ai fliste aq mirë anglisht. Ai është humbja më e madhe për ne”, shtoi babai i tij.
Zyrtarët shtonin se mashtruesit kishin identitetin e një vajze që i dërgonte foto erotike, dhe i kërkonte në këmbim imazhe të tij.
Babai tij shtonte ‘Dinal kishte pasur të dashura dhe fliste hapur për to, nuk e di si ndodhi dhe tani shqetësohem për djemtë e tjerë”.
Një zëdhënës i rrjetit Snapchat tha për tragjedinë: “Çdo shfrytëzim seksual i të rinjve është i tmerrshëm dhe ne punojmë në shumë mënyra për të zbuluar dhe parandaluar këto abuzime në bashkëpunim me policinë”.