Sipas raportimeve më të fundit, të paktën 29 persona kanë humbur jetën, pasi një autobus me turistë gjermanë u përmbys në ishullin portugez të Maderisë. Ndërkohë 27 të tjerë raportohen të plagosur.
Aksidenti ndohi pranë qytetit të Caniço, rreth orës 18.30 kur shoferi humbi kontrollin e autobusit dhe doli nga rruga, thotë agjencia portugeze e lajmeve, Lusa.
Lexo edhe: Përmbyset autobusi me turistë
Mjeti ra mbi çatinë e një shtëpie. “Nuk kam fjalë të përshkruaj atë që ka ndodhur. Nuk përballem dot me dhimbjen e këtyre njerëzve”, ka thënë kryebashkiaku Filipe Sousa.
Ai shtoi se të gjithë turistët në autobus ishin gjermanë, por mes viktimave e të plagosurve mund të ketë dhe njerëz të zonës. 11 vitkima ishin burra dhe 17 gra, shtoi Sousa. Viktima e 29-të ishte një grua që ndërroi jetë për shkak të plagëve të mara në spital.
Zv.presidenti i rajonit të Madeirës, Pedro Calado thotë se autobusi ishte i sigurtë dhe se “është herët për të folur për shkaqet e aksidentit”.
Presidenti portugez, Marcelo Rebelo de Sousa po shkon vetë në vendngjarje, thonë agjencitë.
Kryeministri Antonio Costa i ka dërguar një mesazh ngushëllimi kancelares gjermane, Angela Merkel, bën të ditur agjencia e lajmeve Reuters.
Zëdhënësi i qeverisë gjermane, Steffen Seibert ka shkruar në Twitter për ngjarjen e rëndë. “Trishtim i thellë për ata që humbën jetën në aksidentin e autobusit, mendimet tona shkojnë për të plagosurit”
Madeira ka qenë skenë dhe e një tjetër aksidenti fatal me autobus, në 2005, ku pesë turistë italianë humbën jetën në Sao Vincente.