Nëna 25-vjeçare që humbi jetën në Berat në mënyrë tragjike sëbashku me të birin 6-vjecar ka kryer manovër të gabuar gjatë drejtimin e mjetit. Eksperti i sigurisë rrugore, Islam Qibini ka shpjeguar se rruga ku ajo ka kryer parakalim ka qenë shumë e ngushtë. Ai thekson se në raste të tilla, nuk mund të kryesh parakalim, pasi të çojnë në aksidente rrugore.
“Pa patur hapësirën e nevojshme nuk mund të kryesh parakalim. Përballë ka pasur një kamion. Duhet ta kishte ndihmuar duke u spostuar sa më djathtas dhe të ulte shpejtësinë se ajo ka qenë në përfundim të parakalimit. Mendohet rreth 60-70 km/h por i përket grupit hetimor për këqyrjen e vendit të ngjarjes, tabelat. Jo se nuk lejohet, referuar sinjalistikës horizontale, lejohet por gjithmonë kur ka hapësirë”, tha ai.
25-vjeçarja Klaudia Xhaferaj kishte vetëm 20 ditë që e kishte marrë patentën, teksa eksperti Qibini thotë se nuk i plotësonte kriteret për ta marrë. Ai iu bën thirrje autoriteteve që të mos japin patenta personave që nuk kanë aftësitë e duhura për të drejtuar makinë.