Ministrja për Europën dhe Punët e Jashtme, njofton se deri më tani nuk ka ende informacione për shqiptarë në radhët e viktimave apo të plagosurve si pasojë e aksidentit tragjik hekurudhor në Tempi të Greqisë.
Ministria thotë se është në komunikim të vazhdueshëm me ambasadën në Athinë dhe Konsullatën e Përgjithshme në Selanik lidhur me aksidentin. Ndërkohë raportohet se përfaqësues të konsullatës kanë shkuar në vendngjarje.
“Të trishtuar nga aksidenti tragjik që ndodhi në Tempe në Greqi nga përplasja e dy trenave. Mendimet dhe lutjet tona shkojnë për viktimat dhe familjet e tyre të këtij aksidenti vdekjeprurës. Shërim sa më të shpejtë të plagosurve”,-thuhet në mesazhin e ministres Olta Xhaçka.