Gjatënjë daljeje publike në emisionin “Sophy Ridge” në televizionin “Sky News”, zvendëskryeministrja e Ukrainës lëshoi akuza të rënda ndaj Rusisë ku i bëri përgjegjës ata për kryerjen e akteve të “gjenocidit” gjatë pushtimit të vendit të saj.
Zv. kryeministrja ukrainase, Olha Stefanishyna deklaroi se ajo “beson absolutisht” se aktet e gjenocidit janë kryer nga regjimi rus dhe tha se presidenti Vladimir Putin dhe udhëheqësit në Kremlin “janë kriminelë lufte”.
Stefanishyna tha se numri i “viktimave civile” të vrarë dhe të plagosur gjatë pushtimit rus ka qenë “shumë më i madh se forcat e armatosura të Ukrainës” dhe pretendoi se “gratë janë përdhunuar për orë të tëra dhe më pas janë vrarë” nga ushtarët rusë.
Ndër të tjera, zyrtarja u zotua gjatë intervistës se “Ukraina do të rezistojë për aq kohë sa të jetë e nevojshme” dhe tha se prokurori publik i vendit do akuzojë trupat ruse për krime lufte, duke vënë në dukje se rreth 2,000 raste janë hapur tashmë.
Ajo vlerësoi gjithashtu liderët turq dhe izraelitë për rolet e tyre në përpjekjen për të ndërmjetësuar një marrëveshje paqeje, por paralajmëroi se Ukraina nuk do të pajtohet me asnjë zgjidhje që do të bënte që Rusia të pretendonte territorin e saj, për të cilën ajo tha se ishte “vija e kuqe”.