Ish-deputeti i PD-së, Asllan Dogjani, pjesë e Primareve për bashkinë Kamëz, ka hedhur akuza për vjedhje votash. Dogjani i cili nuk arriti të shpallej fitues, tha se hajdutët kishin prishur procesin e Primareve. ai shtron pyetjen sesi do të kërkojnë demokrarët proces të rregullt më 14 maj, kur sot ata vjedhin njëri-tjetrin.
“Primaret në themel kanë qenë procesi më i mirë në Partinë Demokratike, por hajdutët brenda sistemit e prishën procesin në Kamëz.
Nuk e kuptoj, se si do kenë fytyrë këta njerëz nesër tu kërkojnë votën atyre nënave demokrate, baballarëve, të rinjve e të rejave që dje ju përplasën derën në fytyrë dhe nuk i lanë për të votuar. Nuk e di, se si do kërkojmë proces të rregullt nesër kur ne sot vjedhim njëri-tjetrin. Nuk u mjaftuan, nuk u kënaqën me heqjen e demokratëve nga lista e votimit, por futën edhe duart në kutitë e votimit.
Në një Qendër Votimi mungonin 100 fletë votimi, në një tjetër kishte fletë votimi tepër. Vëzhguesi ka konstatuar fletë votimi nëpër tokë të plotësuar, mungonin listat e votimit, nuk dihej sa kishin votuar, shumë fletë votimi pa vulë e shumë e shumë probleme të tjera”,-shkruan Dogjani në reagimin e tij.