Gjyqtarja Irena Gjoka ka rrëzuar të gjitha kërkesat e të pandehurve për pavlefshmëri dhe papërdorshmëri të provave.
Gjykata e posaçme ka pranuar kërkesën e prokurorit Sotir Kllapi, ku ka kaluar për gjykim dosjen ndaj ish presidentit Ilir Meta dhe Monika Kryemadhit, të cilët akuzohen për korrupsion, fshehje pasurie dhe pastrim parash, si dhe për Pirro Xhixhon për veprën penale korrupsion pasiv dhe për Ema Çokun e Fatime Kryemadhin, të cilët akuzohen për pastrim parash. SPAK mbylli hetimet në gusht të vitit 2025, ndërsa vetëm këtë të mërkurë togat e zeza arritën në një vendim përfundimtar.
Sipas hetimit, Ilir Meta akuzohet për marrëveshjen CEZ-DIA, lobimin dhe shpenzimet familjare. Ndërsa Monika akuzohet për 3 raste korrupsioni, si dhe ndërhyrjet estetike.
Sa i takon Pirro Xhixhos, SPAK thotë se dyshohet se ka shfrytëzuar autoritetin e tij si Kryetari i AKEP-it, ku u propozua nga LSI-ja, dhe në zbatim të porosive të marra nga Meta dhe Kryemadhi ka ndikuar tek drejtuesit e një kompanie telefonike celulare që të lidhin kontratë interkonjeksioni të transferimit të thirrjeve telefonike me kompaninë.
Hetimi nisi në vitin 2019 pas dy kallëzimeve të mbërritura në SPAK.