Spekulime nga më të ndryshmet e më të çuditshmet për shëndetin e presidentit rus Vladimir Putin kanë qarkulluar për muaj të tërë, sidomos pas nisjes së luftës në Ukrainë. Tani disa burime pohojnë se aleatët e tij më të afërt janë shumë “nervozë” dhe të shqetësuar për vdekjen e tij, që mund të jetë krejt e papritur.
Në fillim të këtij viti, inteligjenca zbuloi se Vladimir Putin, po trajtohej për kancer. 53 faqe, në dokumentet e zbuluara nga Pentagoni, zbuluan se disa nga gjeneralët kryesorë të Putinit kishin planifikuar t’i jepnin fund luftës gjithnjë e më të kushtueshme dhe të turpshme në Ukrainë, nëse lideri i tyre do të përballej me vdekjen. Në dokumente pretendohej se Sekretari i Këshillit të Sigurisë Kombëtare të Rusisë, Nikolay Patrushev dhe shefi i Shtabit të Përgjithshëm rus, Valery Gerasimov, ishin pas komplotit për të “sabotuar” përpjekjet e Putinit për luftë. Kohët e fundit, kanali Telegram General SVR, pretendoi se Putini, 70 vjeç, kishte vuajtur shumë nga sëmundja dhe se ata që e rrethonin po bëheshin gjithnjë e më nervozë.
Aty thuhej: “Vdekja e papritur e Putinit do t’i vendosë miqtë e Putinit, të gjithë përpara të panjohurës, ose më mirë, në prag të mbijetesës.” Kanali shtoi se Putini kishte vuajtur nga shikimi i paqartë dhe gjuha e mpirë, si dhe “dhimbje të forta” në kokë dhe “humbje të pjesshme të ndjeshmërisë në krahun dhe këmbën e djathtë”.
Megjithatë, Kremlini ka mohuar çdo thashethem, duke thënë se Putini është në gjendje të mirë shëndetësore. Por kjo nuk i ka ndaluar spekulimet, të përforcuara edhe nga lëvizjet e çuditshme të liderit rus në publik, si dhe pretendimet e inteligjencës ukrainase se Putini përdor sozi.