Një grup që është krijuar rreth shtatë vite më parë dhe që i bashkon pasioni për kuajt dhe stilin e famshëm covvboys.
Së fundmi “Albanian Cowboys” kanë nisur një tur nëpër qytete ku janë ndalur në Burrel.
Ata janë të rinj të profesioneve të ndryshme, nga oficer policie e deri tek punonjës të administratës shtetërore, kanë të gjithë pasion kuajtë.
Aktualisht grupi ka rreth 20 anëtarë që kanë si qëllim të promovojnë vendin tonë, me vizita në qytete e vende të ndryshme.
Ata zhvilluan një paradë në rrugët e qytetit të Burrelit, për të vijuar më pas në fshatra.
Drejtuesi i grupit “Albanian Cowboys”, Shkëlzen Brahaj, thotë se qëllimi i grupit nuk është aspak fitimprurës, pasi në thelb ka promovimin e vendeve të ndryshme të Shqipërisë e kjo bëhet e ndërthurur me pasionin ndaj kuajve.
Brahaj shprehet se anëtarësimi në Federatën e Hipizmit është i pamundur për shkak të legjislacionit shqiptar, sepse stili që ata promovojnë dhe ushtrojnë nuk bën pjesë në federatë.
Gazmir Fiçorri është anëtari i grupit “Albanian Cowboys” që përfaqëson Burrelin. Ai shprehet se një tjetër qëllim i këtij grupi është dhënia e mesazhit për të rinjtë që të rrijnë larg veseve të këqija dhe të merren me këtë sport të bukur.
