Alibeaj “sfidon” Berishën, prezanton prioritetet e grupit parlamentar: Të lëmë konfliktet mes vetes

Enkelejd Alibeaj mblodhi grupin e deputetëve të PD të cilët e mbështesin, për të prezantuar për publikun prioritetet para nisjes së sesionit të ri parlamentar, edhe pse Sali Berisha ka prezantuar Luçiano Boçin si kreun e grupit parlamentar të PD-së. Po ashtu Alibeaj tha se opozita harxhoi energji të panevojshe në konfliktin mes vetes, gjë që sipas tij, duhet të ndryshojë. “Tanimë është momenti që opozita të fokusohet vetëm tek problemet e qytetarëve për të ofruar zgjidhjen. Ne besojmë që zgjidhja është rruga për t’i bindur shqiptarët që oferta jonë është e duhura përballë propagandës dhe arrogancës së qeverisë. Për t’i thënë çdo shqiptari se në parlament nuk jemi të gjithë njësoj. Ne jemi të bindur që arroganca e qeverisë mposhtet me ofertë jo me retorikë boshe politike. Me alternativë dhe jo me batuta bajate. Me denoncime konkrete dhe jo me akuza të hedhura në ajër. Me distancim real ndaj korrupsionit dhe oligarkëve, jo me selektivitet dhe lojë interesash”.

Prioritet e propozuara

I. REFORMA LEGJISLATIVE

1. Reforma Zgjedhore dhe Reforma Administrativo-Territoriale
2. Reforma për Dekomunistizimin e shoqërisë
3. Reformat Antikorrupsion dhe luftën ndaj Krimit të Organizuar

II. MBROJTJA E INTERESIT TË QYTETARËVE

1. Paketa Ekonomike + Energjitike
2. Paketa e Interesit tonë kombëtar

III. KONTROLLI PARLAMENTAR

1. Megaafera e “Portit të Durrësit”, ku Edi Rama, pa asnjë transparencë dhe pa garë, do të përdor në një projekt privat, miliarda euro pasuri publike;
2. Afera e “Aeroportit Ndërkombëtar Nënë Tereza”, ku Edi Rama, pa asnjë transparencë dhe pa garë, vendosi të zgjasë nga 20 vjet në 35 vjet afatin e kontratës koncesionare, duke dhënë kështu praktikisht një koncesion të ri që i siguron klientëve të tij edhe mbi 500 milion euro të tjera fitime;
3. Aferat me pronat publike në bregdet me të ashtuquajturat “Investime Strategjike”, ku Edi Rama, pa asnjë transparencë dhe pa garë, po i fal miqve dhe bashkëpunëtorëve të tij, pasuri publike me vlerë miliona euro;
4. Aferat në tenderat publik, PPP apo koncesionet në të gjitha fushat, që janë shndërruar në skema të pastra të vjedhjes së qytetarëve dhe janë kthyer në një gropë për Buxhetin e Shtetit.