Komisioni i Ligjeve ka publikuar axhendën e tij për javën e ardhshme, ku më 14 tetor, në orën 10:00, është parashikuar raportimi i Prokurorisë së Posaçme kundër Korrupsionit dhe Krimit të Organizuar (SPAK) për veprimtarinë e vitit 2024. Raportimin do ta mbajë Prokurori i Posaçëm, Altin Dumani, i cili ndodhet drejt fundit të mandatit të tij.
Ky pritet të jetë një nga raportimet e fundit të Dumani-t para deputetëve, pasi mandati në krye të SPAK po i mbyllet, duke hapur garën për emrin e ri që do të drejtojë këtë institucion. Burime nga sistemi i drejtësisë bëjnë të ditur se diskutimet për pasardhësin kanë nisur, ndërsa brenda strukturës janë rritur pritshmëritë dhe tensionet mbi drejtimin që do të marrë SPAK në fazën e ardhshme.
Përveç raportimit të Dumani-t, në të njëjtën seancë pritet të paraqiten edhe Ministri i Drejtësisë dhe Prokurori i Përgjithshëm me raportet e tyre mbi gjendjen e kriminalitetit në vend për vitin 2024.