Ambasada e Shqipërisë në Mbretërinë e Bashkuar ka reaguar zyrtarisht ndaj BBC-së, duke e detyruar median britanike të korrigjojë titullin e një artikulli që, sipas saj, stigmatizonte padrejtësisht të gjithë komunitetin shqiptar për veprimet e tre individëve.
Artikulli, i publikuar më 24 korrik, mbante fillimisht titullin “Albanians used false papers for settlement scheme” (“Shqiptarët përdorën dokumente false për skemën e qëndrimit”), por pas reagimit të Ambasadës u ndryshua në “Trio used false papers for settlement scheme” (“Tre persona përdorën dokumente false për skemën e qëndrimit”).
Në reagimin e saj, Ambasada falënderoi shqiptarët që ngritën zërin kundër stereotipeve dhe përgjithësimeve të padrejta në media, duke theksuar se raportimi duhet të jetë i saktë, i paanshëm dhe i bazuar në fakte.
Sipas Ambasadës, formulimi fillestar i BBC-së ishte i padrejtë dhe stigmatizues, pasi ia atribuonte veprimet penale të tre individëve një kombësie të tërë. Në reagim theksohet se përgjegjësia për vepra penale është individuale dhe jo kolektive, ndërsa përgjithësime të tilla ushqejnë paragjykime ndaj mijëra shqiptarëve që jetojnë dhe kontribuojnë me ndershmëri në Mbretërinë e Bashkuar.
Ambasada deklaroi se do të vijojë të reagojë sa herë që Shqipëria ose qytetarët shqiptarë trajtohen në mënyrë të padrejtë, diskriminuese apo stereotipizuese në media, duke theksuar se respekti për të vërtetën dhe dinjitetin e çdo komuniteti është një vlerë themelore e një shoqërie demokratike.