Faktorët e brendshëm vendosin për zgjidhjen e krizës dhe shqiptarët duke respektuar ligjin e Kushtetutën. Kështu është shprehur ambasadori spanjoll Vincente Canelles Montero i cili ndodhet në Korçë.
Ambasadori spanjoll Vicente Canelles Montero ka folur nga Korça për sitatën politike në vend. Ai ka deklaruar se faktorët e brendshëm vendosin për zgjidhjen e krizës dhe shqiptarët, duke respektuar sipas tij ligjin e Kushtetutën.
“Është e vërtetë që situata politike në Shqipëri është e tensionuar por nuk janë ambasadorët e huaj ata që mund të vendosin sesi mund të kapërcehet kjo gjë. Vetëm shqiptarët mund të vendosin, sigurisht duke respektuar ligjin, shtetin e të drejtës, kushtetutës. Jeni ju ata që duhet të vendosni sesi mund të dilni nga ky moment i vështirë”, deklaroi Montero.
Ai ka treguar eksperiencën e tij në Spanjë, duke treguar dialogun si e vetmja rrugë.
“Në Spanjë kur kemi hasur momente të tilla të vështira ato janë zgjidhur me dialog dhe me të gjitha palët politike të cilat janë treguar të gatshme për të hequr dorë nga disa këndvështrime fillestare dhe për të gjetur një pikë dakordësimi mes tyre. Për mendimin tim ne të huajt jemi këtu vetëm për të vëzhguar situatën dhe për të shpresuar për më të mirën dhe nuk besoj se ambasadorët duhet të ndërhyjnë në punët e brendshme të vendit”, tha ambasadori spanjoll.
I pyetur për Gjykatën Kushtetuese, Montero tha se duhet një zgjidhje e shpejtë.
“Këto janë vështirësi që duhet ti zgjidhni. Është një vështirësi dhe shpresojmë që do të zgjidhet shpejt. Duhet të gjendet një zgjidhje dhe pa kaluar shumë kohë madje”, u shpreh ai.