Ambasadorja e SHBA-së Yuri Kim ishte e pranishme mbrëmjen e së enjtes në sheshin “Skënderbej”, në koncertin madhështor ku u festua 100-vjetori i lidhjes së marrëdhënieve diplomatike Shqipëri-SHBA dhe çelja e negociatave për anëtarësimin e Shqipërisë në Bashkimin Europian.
Yuri Kim ka përcjellë edhe një mesazh falënderues për popullin shqiptar, për këngëtarët që kënduan në koncert dhe për kreun e Bashkisë së Tiranës, Erion Veliajn, i cili organizoi këtë natë festive.
“Festë fantastike mbrëmë për të festuar 100 vitet e marrëdhënieve SHBA-Shqipëri dhe hapjes së negociatave me BE-HISTORI! Faleminderit të gjithë performuesve dhe kreut të Bashkisë së Tiranës Erion Veliaj për këtë natë të paharrueshme.
Faleminderit udhëheqësve ndër vite për ndërtimin e marrëdhënieve tona. Mbi të gjitha, falënderoj popullin e Shqipërisë për sakrificat, punën e palodhur, vendosmërinë dhe optimizmin tuaj që kanë prodhuar këto arritje historike. Jeni më të mirët”, shkruan Yuri Kim në mesazhin e saj.