Administrata Tatimore ka lëshuar një njoftim të rëndësishëm për të gjithë tatimpaguesit, duke kujtuar se data 30 qershor 2026 është afati i fundit ligjor për dorëzimin e deklaratave të prapambetura, me qëllim përfitimin nga amnistia e gjobave.
Bëhet fjalë për të gjitha deklaratat tatimore që nuk janë dorëzuar për periudhat deri më 31 dhjetor 2024. Pas kësaj date, çdo biznes që nuk ka rregulluar pozicionin e tij do të humbasë përfundimisht të drejtën për të përfituar nga kjo lehtësi ligjore.
“Tatimpaguesit që kanë deklarata tatimore të padorëzuara për periudha deri më 31.12.2024 kanë kohë deri më 30 Qershor 2026 për t’i dorëzuar dhe për të përfituar nga fshirja e gjobave për mosdeklarim në afat. Kujdes! Tatimpaguesit që nuk respektojnë afatin ligjor do të humbasin të drejtën për të përfituar”, thuhet shprehimisht në njoftimin e Tatimeve.
Në kuadër të zbatimit të ligjit të ri për fshirjen dhe shuarjen e detyrimeve tatimore, përfaqësuesit e Administratës Tatimore kanë zhvilluar takime me bizneset për të sqaruar llojet e shkeljeve administrative që falen. Nëse deklarimet bëhen brenda afatit, bizneset përfitojnë fshirjen e gjobave automatike të vendosura deri në fund të vitit 2024.