Ashtu siç është paralajmëruar zyrtarisht Kuvendi Kombëtar i Partisë Demokratike pritet të mblidhet më 17 Korrik. Por deri atë ditë, strukturat e PD-së janë përfshirë në një proces analize të brendshme lidhur me rezultatin e zgjedhjeve të 25 Prillit që nuk lidhet aq shumë me argumentimin politik se zgjedhjet “u vodhën”, por me rezultatin konkret në terren krahasuar me zgjedhjet e 2017 dhe ato të 2013-s dhe për herë të parë votat e PD-së krahasuar me ato që ka fituar PS-ja.
Kryesia e PD-së pritej të mblidhej të shtunën por jo zyrtarisht burimet nga PD-ja thonë se ajo mund të shtyhet për shkak se degët nuk i kanë dërguar në bllok të gjithë të dhënat e kërkuara.
Analiza për 12 qarqe nuk është ende gati ndërsa lidershipi i partisë ka në mënyrë telegrafike dhe të përgjithshme rezultatin e PD-së për secilin qark krahasuar me atë të PS-së.
Të dhënat nuk duken optimiste për PD-në kur krahasohen me ato të PS-së edhe pse në shumicën e qarqeve PD-ja ka rritje në raport me veten (7 qarqe) krahasuar me zgjedhjet pararendëse.
Nuk duhet harruar as fakti se PD-ja kësaj here doli bashkë me aleatët në një formacion politik.
Gazeta “Si” ka mbledhur të dhënat për çdo qark duke krahasuar dy forcat kryesore politike në vend krahasuar me zgjedhjet e 2017 dhe ato të 2013-s.
Nga të dhënat e mbledhura vihet re PD-ja është në epërsi me PS-në në vetëm katër qarqe; Shkodër, Kukës, Dibër dhe Lezhë. Epërsia në këto qarqe ka ekzistuar edhe në zgjedhjet e kaluara 2013 dhe 2017.
Edhe pse 8 vite në pushtet të PS-së, PD-ja nuk ka mundur të thyejë këtë raport, duke mbetur në vend numëro me qarqet që ajo është më mirë me vota krahasuar me PS. Madje zgjedhjet e fundit, PS-ja iu afrua shumë në rezultat PD-së në qarkun e Dibrës.
Rezultatin më të mirë PD-ja e ka në qarkun e Shkodrës. Ajo ka një rritje si force politike krahasuar me zgjedhjet e 2013 dhe 2017 edhe pse nuk është përkthyer në mandate.
Në 2013-n PD mori 45.799 vota e përkthyer në pesë mandate. Në 2017, 40.763 vota që nuk ndryshoi në mandate ndërsa zgjedhjet e fundit mori rezultatin më të mire 47.205 vota që nuk u përkthye sërish në mandate duke mbetur në kufijtë e 5 të tillave.
PD-ja në këtë qark është në epërsi me PS-në. PS-ja rezultatin më të mirë e ka në zgjedhjet e 2017-s me 39.247 e përkthyer në 4 mandate. Në zgjedhjet e 2021-it, PS ka marrë më pak vota se dy zgjedhjet pararendëse (30.296 vota) e përkthyer në tre mandate. PS-ja nuk është në epërsi votash as me PD-në në këtë rast.
Në krahasim me PS-në, PD-ja është në epërsi votash edhe në Qarkun e Kukësit.
Në zgjedhjet e fundit parlamentare, PD-ja (bashkë me aleatët) nën siglën PD-AN ka marrë rezultatin më të mirë krahasuar me 2017 (që kishte 19.935 vota) dhe me 2013 (22.428 vota).
Në zgjedhjet e 2021-it PD-ja mori 24.071 vota shumë herë më mirë edhe se PS-ja në këto zgjedhje që në atë qark mori 13.856 vota. E përkthyer në mandate PD-ja ka dy ndërsa PS-ja një deputet.
Rezultatin më të mirë PS-ja tre zgjedhjet e fundit në Kukës e ka vetëm në 2017-n kur mori 18.387 vota.
Qarku tjetër ku PD-ja ka ruajtur epërsinë ndaj PS-së (por me rezultat më të ngushte në 2021) është qarku Dibër.
PD-ja ka rezultatin më të dobët të saj krahasuar me zgjedhjet e 2013-ës kur mori 30.137 vota. Në zgjedhjet e 2021, PD-ja fitoi 29.020 vota një rezultat gjithësesi më i mirë me 2017-n kur mori 21.331 vota.
E përkthyer në mandate, PD-ja ka ruajtur numrin 3 ndërsa i është afruar ndjeshëm PS-ja këto zgjedhje duke marrë rezultatin më të mirë të saj krahasuar me dy zgjedhjet pararendëse.
PS-ja (në këtë qark) zgjedhjet e 2021-it mori 28.742 vota rreth katër mijë vota më shumë se zgjedhjet e 2017-ës.
PD-ja ruan epërsi ndaj PS-së edhe në qarkun e Lezhës. Edhe pse PS-ja është rritur në këtë qark në vota krahasuar me zgjedhjet e 2013 dhe ato 2017, ajo nuk e ka thyer dot rezultatin e PD-së.
PD-ja në zgjedhjet e 2021 shënon edhe rezultatin e saj më të mirë për Lezhën (33.998 vota) krahasuar me zgjedhjet e 2013-ës kur mori rreth 31 mijë vota dhe me ato të 2017-ës kur fitoi rreth 27 mijë vota. Gjithësesi këto rezultate janë reflektuar në vetëm një mandat diferencë mes PS dhe PD ndër vite. Aktualisht PD-ja ka marrë 4 mandate ndërsa PS 3 të tilla./Si