Angelina Jolie është një nga aktoret më të famshme në botë, por e ndien se mund të kontribuojë edhe në politikën e SHBA-ve. Gjatë një interviste, aktorja popullore la të kuptohet se një lëvizje e tillë mund të ndodhte. “Nëse do të më kishit pyetur 20 vjet më parë, do të qeshja, por tani them se do të shkoj aty ku nevojitem”, është shprehur ajo.
Jolie është e dërguar e speciale e agjensisë së OKB-së për refugjatët dhe një aktiviste e zellshme për një sërë çështjesh që përfshijnë refugjatët, dhunën seksuale dhe mbrojtjen e natyrës. Në një intervistë për BBC, aktorja diskutoi një sërë çështjesh duke nisur nga mediat sociale e deri tek politika në Shtetet e Bashkuara, e aty bëri dhe pohimin e fortë: nuk e di nëse jam e prerë për politikë, por në fund të fundit nuk kam përse të mos e provoj.
“Jam në gjendje të punoj me qeveritë, jam në gjendje të punoj me ushtritë, pra jam në një pozicion mjaft interesant për të qenë në gjendje që të bëj shumë gjëra”, u shpreh Jolie.
E pyetur nëse mund të ishte në listën e 30 apo 40 demokratëve që do të konkurrojnë për nominimin presidencial, ajo nuk tha “JO”, por u përgjigj vetëm me një “Faleminderit”.