Ditët e fundit, ashtu si shumë bashki të tjera në vend, edhe ajo e Matit është përballur me një situatë të vështirë për shkak të zjarreve.
Në Qafë Shtamë, Derjan, Laç, Zenisht, Batër, Urakë, Kangrazhd, etj, janë shuar disa vatra zjarri. Punonjësit zjarrëfikës, efektivë të ushtrisë e policisë, specialistë të pyjeve dhe emergjencave civile kanë sakrifikuar shumë për shuarjen e zjarreve.
Kryebashkiaku Agron Malaj i falenderoi sot të gjithë forcat që punuan në terren dhe institucionet që ndihmuan në normalizimin e situatës. Sakaq ai u bëri thirrje banorëve të Matit të tregohen më të kujdesshëm dhe të mbrojnë pyjet nga zjarri.
Postimi i Malajt:
Dua të falenderoj dhe të shpreh mirënjohje për të gjithë heronjtë tanë zjarrfikës që janë të gatshëm në çdo kohë dhe po punojnë intensivisht për përmirësimin e situatës së krijuar nga zjarret në #Mat.
Faleminderit punonjësve të shërbimit zjarrfikës Mat, Ushtrisë, Komisariatit të Policisë, punonjësve të pyjeve dhe emergjencave civile dhe Policisë bashkiake.
Gjithashtu një falenderim të veçantë edhe për Ministrinë e Mbrojtjes që ndihmuan me ndërhyrjen ajrore për vështirësinë e situatës dhe terrenit të vështirë.
Aktualisht në Mat është një vatër zjarri aktive në zonën e quajtur “Kongrazhd” për të cilën po punohet për shuarjen e saj.
Prandaj të nderuar qytetarë ju bëjmë thirrje që të tregohemi të kujdesshëm dhe të mbrojmë pyjet nga zjarri, se kështu mbrojmë mjedisin ku jetojmë por edhe i shpëtojmë përballjes me Ligjin kundër zjarrvënies së qëllimshme.
