Avokati Spartak Ngjela e cilësoi një goditje të nivelit të lartë nga ana e Prokurorisë së Posaçme arrestimin e sekretares së Përgjithshme të Ministrisë së Shëndetësisë, Joana Duro.
“SPAK-u ishte në pozicion të ngrirë deri më tani siç e kisha parë unë. Ndoshta ka filluar të lëvizë, goditja ishte e nivelit të lartë. Nga eksperienca deri tani dimë se sekretarët e shtetit në Shqipëri kanë bërë shumë abuzime. Nuk flas për këtë në veçanti se do shohim provat. Por flas në 30 vite, sekretaret e shtetit në ministri kanë vënë firma për korrupsion. Mirëpo do shohim si do përparojë SPAK-u për këtë çështje konkrete. Nuk ishte nivel i lartë i korrupsionit. Nivel i lartë janë ministra e tutje”, tha Ngjela në një lidhje skype për “Report TV”.