Një 52-vjeçar me origjinë shqiptare u vu në pranga pas një bashkëpunimi disamujor mes autoriteteve greke dhe atyre holandeze.
Mediat greke raportojnë se shqiptari, i cili besohet të jetë organizatori i një karteli të madh droge, u arrestua në Glyfada dhe kërkohej me një urdhër arresti evropian, si anëtar drejtues i një organizate kriminale që merret me grumbullimin dhe shpërndarjen e shumave të mëdha parash në Holanda nga tregtia e paligjshme e lëndëve narkotike.
Në kontrollin e kryer në banesën e të dyshuarit, janë gjetur dhe sekuestruar shuma parash në kartëmonedha nga vende të ndryshme, duke përfshirë euro, dollarë amerikanë, dollarë kanadezë, dollarë australianë, franga zvicerane, lira turke, dirhemë të Emirateve të Bashkuara Arabe dhe Rand i Afrikës së Jugut.