Avokati i të shumë kërkuarit të drejtësisë, Talo Çelës, është shprehur pas seancës së sotme se ai nuk ka asnjë kontakt me klientin e tij, kurse prokurën tha se e ka marrë nga vëllai i cili sot nuk jeton më.
Talo Çela është një nga të akuzuarit kryesorë për grabitjen e bujshme të Rinasit, por avokati i tij deklaroi lidhur me këtë akuzë se nuk ka prova se Çela ka qenë në vendngjarje, ndërsa ka kërkuar dhe dëshminë e një berberi, i cili pretendon se atë ditë Çela ka qenë duke u qethur.
Mes të tjerash, avokati pretendon se disponon edhe prova që vërtetojnë se ditën e ngjarjes, klienti i tij ndodhej tek Liqeni i Thatë në Tiranë.
“Nuk kam asnjë kontakt, po ta dija do ta kontaktoja, prokurën ma ka përcaktuar vëllai i tij që aktualisht nuk jeton më. Me Talo Çelën jo vetëm që se kam takuar, por s’kam asnjë telefonatë. Këto janë çështje që do gjykohen, do merren prova dhe më pas do vendoset. Sipas meje nuk ka qenë në grabitje, nuk ka prova që kanë qenë në grabitje, në atë datë ka prova se ka qenë te Liqeni i Thatë. Berberin e kërkova sepse ai pretendon se ditën e ngjarjes ka qenë duke u qethur ai”, tha ai.
Ndërkohë, avokati Luan Kaloçi i tha gjykatës në seancën e sotme se klienti i tij nuk kishte qenë në grabitje.
Referuar asaj që deklaroi avokati, Talo Çela kishte pasur një problem shëndetësor me gjurin dhe ishte i paaftë fizikisht të merrte pjesë në grabitje. Njëkohësisht, avokati kërkoi pyetjen e ish-të penduarit Alkond Bengasi dhe të bashkëpandehurve Klement e Eldi Cala. Çela po gjykohet i veçuar nga të bashkëpandehurit e dosjes, pasi për një vit procesi ndaj tij ishte i pezulluar.