Babai i Bledi Angjos, një prej autorëve të dyshuar për vrasjen e 26-vjeçarit Martin Çeço në Maliq, deklaroi për mediat se i biri punonte si çoban në Korçë dhe se ka patur probleme me policinë edhe më parë.
“Kam 4 fëmijë, një e kam në Tiranë, Bledi në Korçë, punonte si çoban. S’kam folur me Bledin, më shumë fliste çupa, jam në dijeni që e kanë arrestuar. Vinte këtu por jo shumë shpesh, ka patur probleme edhe më përpara me policinë, e kanë marrë njëherë e ngatërruan, u dënua 4 muaj e akuzuan se kishte ngacmuar një çupë. Nuk është i fejuar por ka patur të dashur”, tha i moshuari.
Bledi Angjo dhe dy kushërinjtë Valter dhe Edlir Mollaj janë vënë në pranga si autorë të ngjarjes të cilën e kishin inskenuar të dukej si vetëvrasje. Autorët kishin lënë buzë rezervuarit edhe shapkat e 26-vjeçarit, por pas nxjerrjes së trupit të pajetë të të riut, policia konstatoi shenja dhune në pjesën e fytit. Mësohet se i riu kishte krijuar njohje me një vajzë, e cila ka qenë në lidhje paralele me Bledi Angjon.