Kreu i grupit parlamentar të Partisë Socialiste, Taulant Balla akuzon komandatin e Gardës, Ndrea Prendi si autorin e vrasjeve të 4 qytetarëve në bulevardi më 21 janar 2011.
I ftuar në emisionin “Real Story”, Balla u shpreh se Prendi veproi pas urdhërit të marrë nga lart për të qëlluar mbi protestuesit në ikje, duke vrarë të paktën 2 nga 4 viktimat e asaj dite.
Balla theksoi se deklaratat e bëra nga ana e Prendit janë qesharake dhe kriminale, duke shtuar se ai duhet të mos ikë nga Shqipëria, për shkak se ka deklarime të rëndësishme për të bërë për ngjarjen e bujshme.
“Deklarimet e Ndrea Prendit të dënuar me 1 vit burg, për vrasje, pasi ka ekzekutuar dy qytetarë, janë qesharake. Unë jam i bindur se edhe Aleks Nikaj është qëlluar nga arma e Ndrea Prendit. Ajo që ka ndodhur është se zotëria është një gënjeshtar kriminal. Ka qëlluar ky i pari dhe pas tij kanë qëlluar ushtarët e tjerë. Kush është ai shqiptar që e beson se: qënka qëlluar zyra e kryeministrit Sali Berisha. Kur? Pas 10 viteve. Është shumë qesharake. Ndrea Prendi ka marrë urdhër që të vrasë, ai ka qëlluar i pari. Kush është ai shqiptar që beson se qenka qëlluar me plumba zyra e Sali Berishës dhe pas 10 viteve e merrkemi vesh, ndoshta nga ata plumbat pistoletë. Nuk e di se çfarë bën Prokuroria. Ndrea Prendi nuk duhet lënë të ikë nga Shqipëria, ai provokon hapur familjet e viktimave. Policia duhet të kishte kryer më herët veprime për 21 janarin. Unë besoj se ky person nuk duhet lënë që të largohet nga Shqipëria. Me sa di është azilant në një vend të Amerikës së Veriut. Arma e tij është vërtetuar se ka kryer të paktën 2 nga vrasjet e 21 janarit. Predha e gjetur në kokën, tashmë dëshmorit të ardheut Aleks Nikaj është dëmtuar, dëmtuar qëllimisht,” tha Balla.