Kryetari i Partisë Demokratike, Lulzim Basha ka hedhur akuza të forta ndaj paraardhësit të tij, Sali Berishën, të cilin vendosi ta përjashtonte nga partia.
Në një intervistë për ABC me gazetarin Juxhin Mustafaraj, Basha deklaroi se Berisha më 8 janar drejtoi një organizatë kriminale për të vrarë funksionarët e PD.
I pyetur nëse vuri në rrezik përfaqësuesit e PD për mbledhjen e thirrur në seli, ndërkohë që jashtë do të zhvillohej protesta, kreu i demokratëve thotë se nuk ishin ata në vendin dhe orën e gabuar, por Sali Berisha dhe organizata e tij kriminale.
“Në këtë botë na sjell zoti, na rrit familja jonë. Në politikë futemi me vullnetin tonë dhe një nga përpjekjet kryesore të jetës time politike është t’i çliroj shqiptarët nga mentaliteti që të solli ky dhe të hoqi ai. Sali Berisha është përjashtuar me unanimitet nga Kryesia e Partisë Demokratike ditën pasi vendosi të sillej jo si politikan, por si kreu i një organizate kriminale antikombëtare, antiamerikane dhe provoi tentativën e vrasjes të një grupi drejtuesish dhe anëtarësh të Partisë Demokratike në selinë e Partisë Demokratike pasi kishte nisur një fushatë të nxitjes së dhunës, të gjuhës së urrejtjes, të përçarjes së demokratëve për të shkatërruar Partinë Demokratike siç e paralajmëroi vetë që nëse Partia Demokratike nuk do të kthehej në bunker për hallin e tij personal, ai do ta shkatërronte, nuk e meritonte të ekzistonte“, deklaron Basha.