Kryetari i Partisë Demokratike Lulzim Basha ishte në Fier për të thirrur gjithë mbështetësit të tij në protestën e 16 shkurtit. Duke nënvizuar që “dyshimi, mosbesimi dhe shuarja e shpresës janë armët e fundit të regjimit”, Basha deklaroi që “nuk ka asnjë shans që Edi Rama mos të njoh vitin akademik, viti do të njihet i plotë”.
Megjithatë, një deklaratë e tillë është disi e çuditshme, pasi universitetet janë institucione të pavarura, ku performanca e studentit varet në bazë të krediteve, këto të vlerësuara nga një sërë komponentësh, ku hyn edhe prezenca në leksione dhe seminare. Në këtë mënyrë ai merr kompetencat e pedagogut. Ndërkohë, pritet që rreth orës 11.00 Basha të jetë në Elbasan, ku do të zhvillohet protesta e radhës.