Arritja e marrëveshjes mes faktorit politik shqiptar në Malin e Zi duke formalizuar pjesëmarrjen bashkë në zgjedhjet vendore në Tuz, është përshëndetur edhe nga ish-ministri i Jashtëm i Shqipërisë, Ditmir Bushati. Përmes një postimi në rrjetet sociale, Bushati vlerëson se ky hap përbën një moment të shumëpritur për bashkëkombasit tanë në Malin e Zi dhe është dëshmia më e mirë e maturisë politike. Bushati nënvizon mes të tjerash se kjo është edhe një arritje domethënëse për politikën tonë të jashtme dinamike e konstruktive në rajon.
“Përpjekja dhe angazhimi konstant me të gjithë aktorët politik, Këshillin Kombëtar të Shqiptarëve në Mal të Zi i dha frytet. Me përgjegjshmëri politike dhe mision qytetar, faktori politik shqiptar ka nënshkruar sot marrëveshjen e koalicionit zgjedhor, duke formalizuar pjesëmarrjen në zgjedhjet vendore në Tuz permes një liste të përbashkët “Forumi Shqiptar” me sloganin “Malësia na Bashkon”. Ky hap, që përbën një moment të shumëpritur për bashkëkombasit tanë në Malin e Zi, është dëshmia më e mirë e maturisë politike, dhe në të njëjtën kohë përbën një tjetër arritje domethënëse për politikën tonë të jashtme dinamike e konstruktive në rajon. Suksese të mëtejshme Komunës Tuz! #UrimeMalësia!”, shkruan Bushati.
