Ushtruesja e detyrës së Shefes së Zyrës së Bashkimit Evropian në Kosovë, Eva Palatova, ka zhvilluar takime me zyrtarë të lartë të institucioneve të Kosovës, duke përcjellë mesazhin e BE-së për respektimin e sundimit të ligjit dhe karakterit shumetnik të institucioneve.
Gjatë takimit me ministrin në detyrë të Punëve të Brendshme, Xhelal Sveçla, Palatova theksoi nevojën që institucionet e Kosovës të veprojnë në përputhje me parimet e sundimit të ligjit.
“BE-ja pret që pretendimet për sjellje të pahijshme nga Policia e Kosovës të hetohen dhe që çfarëdo rrënimi të kryhet duke respektuar procedurat e rregullta ligjore”, thuhet në mesazhin e BE-së.
Palatova zhvilloi gjithashtu një takim lamtumirës me zëvendëskryeministrin e parë dhe ministrin në detyrë të Punëve të Jashtme dhe Diasporës, Glauk Konjufca.
Konjufca e falënderoi për angazhimin dhe bashkëpunimin gjatë mandatit të saj në Kosovë, duke vlerësuar kontributin në forcimin e dialogut ndërmjet institucioneve të Kosovës dhe Bashkimit Evropian.
Gjatë takimit u theksua rëndësia e avancimit të procesit të integrimit evropian dhe vazhdimit të bashkëpunimit të ngushtë me BE-në në fushat me interes të përbashkët.
Palatova përcolli mesazhin se Bashkimi Evropian vazhdon të mbështesë rrugën e Kosovës drejt integrimit evropian, duke theksuar se Kosova duhet të përmbushë pjesën e saj të përgjegjësive.
Në përfundim të takimit, Konjufca i uroi Palatovës suksese në angazhimet e saj të ardhshme.