Në një postim në rrjetet sociale, kandidati i Partisë Socialiste për Bashkinë e Shkodrës, Benet Beci, ka falenderuar të gjithë mbështetësit e tij dhe u ka bërë atyre një kërkesë.
Ai thotë se do t’i përgjigjet kujtdo që pyet dhe ngre çështje që i vlejnë qytetit, por nuk do t’i lë askujt hapësirë për të hedhur baltë mbi askënd, të përfshirë në këtë garë për qytetin.
“Hapa rrjetet sociale sot në mëngjes… Dua të falenderoj secilin prej jush që gjen kohë për të më ndjekur e për të më mbështetur! Por kam dhe një kërkesë. Vite më parë, në fushata, viheshin postera gjithandej, duke ndotur fasada e duke bërë pis imazhin e një qyteti. Tani kohët kanë ndryshuar. Fatmirësisht nuk ndotin më mjedisin, por po ndotim pafund “muret” e profileve në rrjete sociale.
Përveçse e pakuptimtë, kjo “luftë” për të ngritur ekipe njerëzish me profile false që baltosin pa logjikë, pa etikë, pa edukatë, më duket një shpenzim i pafund energjish, që po ta kanalizonim në një tjetër drejtim do të mund të bënim punë shumë të mira. Ndaj ftesa ime është e hapur dhe e qartë: do t’i përgjigjem kujtdo që pyet e ngre çështje që i vlejnë qytetit, por nuk do t’i lë askujt hapësirë për të hedhur baltë mbi askënd të përfshirë në këtë garë për qytetin.
Jeta është shumë e shkurtër për me pasë kaq mllef, e Shkodra është shumë e bukur për mos me dalë me e pa sa herë gjejmë kohë. Ditë të mbarë për të gjithë”, shkruan ai.